ROXAS CITY – Nangin madinalag-on ang ginpatigayon nga mga operasyon sang Pilar PNP sa bulan sang Mayo kun sa diin nakaaresto ini sang tatlo ka persona nga may nagkalain-lain nga kaso.
Suno kay PMAJ Alfred De Leon, Hepe sang Pilar Municipal Police Station, nadakpan nila sang Mayo 1 ang Top 10 Most Wanted Person Regional Level nga may kaso sang 2 counts of rape, samtang sang Mayo 2 naman natigayon man nila nga naaresto ang wanted nga persona nga may kaso nga attempted homicide.
Dugang pa sini, madinalag-on man nila nga nadakpan sang Mayo 23 ang persona nga nagmaoy kun sa diin naglapas ini sa tatlo ka mga kaso nga RA 10591, RA 9516 kag RA 9165 bangud nakuhaan ini sang isa ka yunit sang armas luthang, isa ka granada kag suspected shabu.
Pahayag ni PMAJ De Leon nga wala sila nagauntat sa pagpatigayon sang operasyon agud mapabilin nga malinong kag matawhay ang banwa sang Pilar.
Panugyan ni De Leon sa mga pumuluyo nga magkooperar sa mga kapulisan kag kun may mga impormasyon nga nahibaluan may kaangtanan sa mga nagahimo sang iligal nga buluhaton, gilayon ini nga i-report sa ila talatapan.
