Nautod ang tudlo kag nag-angkon sang pilas sa magkatuhay nga parte sang lawas ang isa ka big bike rider matapos ini ang mag-overtake sa isa ka truck kag bumunggo sa nakasugata nga SUV sa Barangay Malocloc Norte, Ivisan, Capiz.
Ginkilala ang rider kay alyas “Sandy”, 37-anyos, residente sang Brgy. Tina, Badiangan, Iloilo.
Samtang, ang driver sang puti nga SUV ang ginkilala kay alyas “Archie”, 63-anyos, isa ka retired seaman kag residente sang Caticlan, Malay, Aklan.
Sa nakuha nga impormasyon sang Bombo Radyo Roxas sa Ivisan MPS, ginapahayag nagtuyo nga mag-overtake ang rider sa ginasundan sini nga dump truck apang, sa tion sang pag-overtake sini bumunggo ini sa kasugata sini nga SUV.
Bangud sa mabaskog nga impact, nag-angkon sang pilas, bagras sa tuhod kag nautod ang isa ka tudlo sang nasambit nga rider. Wala man sang naangkon nga pilas ang driver kag mga pasahero sang SUV.
Sa karon, nagapabilin sa isa ka pribado nga ospital sa syudad ang driver sang motorsiklo para sa nagaka-igo nga pagbulong.
