Nagkasugot ang Pilipinas kag China nga padayunon ang pagpatuman sang rotation kag resupply missions sa BRP Sierra Madre sa Ayungin Shoal nga makit-an sa West Philippine Sea.
Ang desisyon ang ginhimo sa ika-10 nga Bilateral Consultation Mechanism (BCM) meeting sang Pilipinas kag China nahanungod sa WPS, nga ginhiwat sa Xiamen, China. Ang meeting nakasentro sa pagsabat sa mga isyu sa rehiyon, kun sa diin pareho nga ginpahayag sang duwa ka pungsod ang ila nga commitment sa dayalogo kag kooperasyon sa pihak sang mga wala pa nasolbar nga isyu.
Ginkasugtan sang duwa ka pungsod nga padayunon ang mga rotation kag resupply operations (RORE) sa Ayungin Shoal agud madula ang tensyon, kag ginkilala ang mga positibo nga resulta sang mga misyon nga ini.
Ginpahayag sang Pilipinas ang mga palaligban natuhoy sa presensya sang mga barko sang Chinese Coast Guard (CCG) malapit sa Zambales kag ang ila aktibidad sa mga maritime zones sang Pilipinas, nga suno sa Department of Foreign Affairs (DFA), indi santo sa 1982 United Nations Convention on the Law of the Sea (UNCLOS) kag sa mga kasuguan nga pang-maritime sang Pilipinas.
Bangud sini, nagkasugot ang duwa ka pungsod nga pabaskugon ang kooperasyon sang ila nga mga coast guard kag ginhatagan-pagtamod ang importansya sang pagbuligay sa ocean meteorology kag marine scientific cooperation.
Liwat nga ginpasiguro sang Pilipinas ang dedikasyon sini sa malinong nga pagresolba sang mga tensyon, pinaagi sa dayalogo kag diplomasya, kaangay sang paghatag sang pagtamod ni Pangulong Ferdinand Marcos Jr.
Samtang, nakatalana naman nga hiwaton sa Pilipinas ang masunod nga BCM meeting nga ‘wala pa sang opisyal nga petsa.
