ROXAS CITY, CAPIZ – Ginpangunahan sang Department of Social Welfare and Development (DSWD) ang pagpatuman sang cash-for-work program para sa mga persons with disabilities (PWD) sa idalom sang “TheraFee” modality sa apat ka Local Government Unit sa Western Visayas.
Sa interview sang Bombo Radyo Roxas kay Judith Barredo, hepe sang Promotive Services Division sang DSWD Field Office VI, kalakip sa mga pilot areas ang Madalag sa Aklan nga may 24 ka benepisyaryo; New Washington, Aklan nga may 21; Bingawan, Iloilo nga may 9; kag Sibunag, Guimaras nga may 20 ka benepisyaryo.
Ang “TheraFee,” kabulig ang National Council on Disability Affairs (NCDA), ang para sa mga PWD nga may permanent total disabilities, kun sa diin ginatutukan sini ang paghatag sang nagakaigo nga bulig, pag-atipan kag suporta.
Sa idalom sang programa, ang mga caregiver ang nagapanguna nga makabaton sang ayuda bilang bayad sa ila pulo (10) ka adlaw nga caregiving service, nga may walo ka oras kada adlaw, para sa ila nga mga himata nga may malala nga sablag sa lawas.
Mabaton sang kada caregiver ang PHP5,130 nga gikan sa PHP5.13 million nga pondo para sa regular nga CFW-PWD subong nga tuig. Paathag ni Barredo, tinutuyo sang proyekto nga mahatagan sang balor ang indi bayad nga serbisyo sang mga caregiver para sa mga PWD na may mga kondisyong kasubong sang cerebral palsy kag mga bedridden.
Napanagtag na ang payout para sa mga benepisyaryo sa Aklan sadtong nakaligad nga bulan, samtang natalana naman ang payout para sa Bingawan kag Sibunag sa Hulyo 10 kag 11.
Ginapatigayon ang proyekto sa mga lugar nga sakop sang Kapangyarihan at Kaunlaran sa Barangay (KKB) sang Kapit-Bisig Laban sa Kahirapan – Comprehensive and Integrated Delivery of Social Services (KALAHI-CIDSS).
Dugang ni Barredo, ginpili ang Western Visayas bilang pilot area subong nga tuig bangud ini ang may pinakadamo nga rehistrado nga PWD kag amo man ang una nga nagbaton sa pilot implementation sang programa.
