Nag-withdraw ang pito ka senador sang ila nga pirma sa committee report sang Senate Bill No. 1979 ukon Prevention of Adolescent Pregnancy Bill.
Kalakip sa mga senador nga nag-withdraw sang ila nga pirma sa bill amu sanday Senators Cynthia Villar, Nancy Binay, JV Ejercito, Christopher “Bong” Go, Jinggoy Estrada, Ramon Bong Revilla Jr. kag Loren Legarda.
Sa letter nga ginpalab-ot sang pito ka senador kay Senate President Francis Chiz Escudero, ginapakakas nila ang ila pirma sa tunga sang mga pagpakamalaot kag pagkahangawa sa hagna.
Apisar nga ginakilala man nila ang pagpanikasog sa pagsabat sa isyu sang pagsaka sang numero sang mga kabataan nga nagabusong, kinahanglanon pa sang dayalogo sa nagkalain-lain nga stakeholders agud mapanas ang sala nga pagpati kag makakas ang mga indi mabaton nga probisyon sa bill.
Ginpahayag ni Senadora Nancy Binay, namati siya suno diri sa panawagan sang publiko rason kun ngaa nag-withdraw ini sang pirma sa committee report.
Suno naman kay Senate President Pro Tempore Jinggoy Estrada, sang nabasa niya ang Senate Bill No. 1979 natalupangdan sini nga madamo sang kwestyunable nga nakasaad sa bill.
Dugang sang senador, mahimo naman ini nga ibalik sa committee level para mag-angkon sang hearing angud sa hagna.
Suno naman kay Senador JV Ejercito, nag-withdraw ini sa committee report agud marepaso kag matun-an pa ang amu nga bill.
Nagpaathag man sanday Senators Ramon Bong Revilla Jr kag Cynthia Villar.
Suno kay Villar, namati man ini sa panawagan sang nagkalain-lain nga sektor kag sang publiko rason kun ngaa nag-withdraw siya sang pirma sa committee report.
Paathag pa sini, sila nga mga senador ang may responsibilidad nga ikunsiderar ang mga panan-awan sang nagkalain-lain nga sektor.
Suno naman kay Revilla, kaayuhan sang mga kabataan ang ginapanumdom sini rason kun ngaa nag-withdraw man ini sang pirma sa committee report sang Senate Bill No 1979.
Samtang, naghatag man sang paathag ang nagaduso sang nasambit nga hagna nga si Senadora Risa Hontiveros.
Nahangpan niya suno diri ang rason sang mga kaupdanan niya nga senador sa pag-withdraw sa committee report. Apang, nag-file si HontIveros sang substitute bill kun sa diin kakason na ang nakabutang nga guided by international standards kag pila pa nga nakasaad sa bill nga ginakahangaw-an sang iban.
