ROXAS CITY- Ginkaalarma ni Police Lieutenant Colonel Francisco Paguia, hepe sang Roxas City Police Station ang pag-gamit sang iya pangalan sa pagpanunto sa siyudad sang Roxas.
Nahibaluan nga isa ka supplier sang bugas ang ginbiktima sang nagpakilala nga si Paguia kag natigayon nga mataban ang P21,000 nga cash.
Ang wala na ginhingadlan nga negosyante, gin-refer ini sang iya himata sa isa ka empleyado sang gobyerno nga amo naman ang kontak sang nagpakilala nga si Paguia.
Bangud nga kakilala man sini ang empleyado, nagbaylohanay sang numero ang negosyante kag ang lalaki nga nagpakilala nga si Paguia kag nag-transaksyon ini nga mabakal sang 80 ka sako sang bugas.
Apang sa ulihi, nagahingyo na sang ‘load’ ang suspek kag ginapakadto pa ini sa isa ka mall agud makahatag sang ginahingyo nga kantidad sang load.
Bangud nga indi makahalin sa pwesto ang negosyante kag pagduda sini, gilayon sini nga gintawgan ang iya himata agud kumpirmahon sa empleyado ang ginhirit sang nagpakilala nga si Paguia.
Wala naman nagduda ang negosyante kag sa ulihe naghatag ini sang kwarta matapos nga na-istorya ang empleyado kag ginpakadtu-an sang tawo sa iya pwesto agud mahatag ang nasambit nga kantidad.
Sa ulihi na lamang natalupangdan sang negosyante matapos nagkontak ang empleyado nga natukiban sang mga ini nga indi si Paguia ang ila kaistorya.
Ginkumpirmar man sang negosyante nga ginbalikan ini sang kwarta sang kakilala nga empleyado sang gobyerno kag ginpalab-ot na lamang kay Paguia ang nasambit nga insidente rason nga ginkaalarma sini kag nagpa-andam sa publiko.
