ROXAS CITY – Hugot nga seguridad ang ginapatuman sang Philippine National Police (PNP) sa pamilya sang ginbuno kag ginluthang-patay nga Capizeño police sa ila nga balay sa Caloocan City.
Ini ang ginpahayag mismo ni Lee Christian Castro, utod sang napatay nga si PO2 Cris Robert Castro, miyembro sang Manila Police District Tondo Police Station 1 sang mainterview sang Bombo Radyo Roxas.
Suno kay Lee, nag-request ang asawa sang napatay nga biktima sang presensiya sang mga kapulisan sa ila nga balay kasunod sang ila nakit-an nga mga makaduluda nga mga indibidwal sa ila nga lugar.
Mahibaluan nga nag-abot na sa probinsiya sang Capiz ang bangkay sang nasambit nga pulis sang nakaligad nga adlaw sang Sabado.
Matandaan nga nag-angkon sang pito ka mga pilas sa likod ang nasambit nga pulis matapos matapos ginbuno kag ginluthang sang mga suspek nga nagpakuno-kuno nga magakaon sa ila nga karinderya.
Nahaya sa karon ang bangkay sang nasambit nga pulis sa puluy-an sang pamilya Castro sa Barangay Libas, Roxas City.
Nagalaum naman ang pamilya sang pamilya Castro sa madasig nga imbestigasyon sang mga otoridad agud mahatagan sang hustisya ang kamatayon sang ila nga himata.
