ROXAS CITY – Nagpaathag si President Roxas Mayor Receliste ‘Tanoy’ Escolin natuhoy sa nagalapta nga video kun sa diin makit-an ang ila pagbaisay nila ni former Vice Mayor kag karon punong barangay sang Barangay Cabug-cabug sang amo nga banwa nga si Alfonso Golero.
Suno kay Escolin, ang ginpalapta nga video sang isa ka Locally-Stranded Individual (LSI) nga nagalawig sang kapin 3 minutos nga malip-ot lamang nga porsyon sang matuod-tuod nga natabo.
Ginpahayag sang alkalde nga una sila nga nagbaisay ni Golero bangud nagpamalabag ini sa plano sang banwa nga pagpatukod sang quarantine facility sa Rural Health Unit compound bangud ginapanindugan sini nga iya hurisdiksiyon kun pasugtan sini ang amo nga plano.
Apang suno kay Escolin nga indi ini mahimo pamalabagan ni Golero bangud ginapanag-iyahan ini sang banwa.
Suno pa sa alkalde nga sa kainitan sang ila diskusyon, kasubong ginhangkat pa siya ni Golero bangud naghambal ini nga indi sila dapat pagpasilabtan sang iban nga tawo kag sila lamang duha ang magaatubangay.
Ginbalagan pa ni Golero sang iya tiil ang isa ka heavy equipment kag suno kay Escolin ginhangkat pa siya sang amo nga kapitan nga duha sila ang mapaipit sa amo nga salakyan.
Kuntani suno kay Escolin nga hibaluon anay sang mga nakakita sang video ang matuod nga natabo antes ini husgaran.
Wala man nauyuanan ni Escolin ang pag-upang ni Golero sa mga lihok sang banwa sa subong nga pandemiya.
Gindugang pa ni Escolin nga kun para kay Golero nga may sala sa iya ginahimo, mahimo man ini makadiretso sa korte agud magreklamo.
