PRESIDENT ROXAS, CAPIZ – Padayon ang pagmonitor sang local government unit sang President Roxas, Capiz sa sitwasyon sang banwa kadungan sang pamahog sang Bagyo Basyang.
Sa interview sang Bombo Radyo Roxas kay Mayor Receliste Escolin, iya ginpahayag nga nagpatigayon ini sang paghinun-anon sa nagkalain-lain nga ahensya angut sa Pre-disaster assessment sang mga posible nga impact nga dala sang Bagyo.
Suno kay Escolin, may mga pre-emptive evacuation man ang tagsa ka mga barangay sa banwa kun sa nakahanda naman ang masobra 3,000 packs sang relief goods nga igapanagtag sa mga pumuluyo nga maga-evacuate.
Pahayag pa niya, naka-standby man ang mga rescue equipment sa tion nga kinahanglanon ilabi na sa pag-rescue sang mga pumuluyo nga ma trap sa baha.
Nagapanawagan man ang natungan sang kooperasyon sa publiko kag magsunod sa tanan nga pahanumdom agud nga malikawan ang ano man nga sahi sang insidente.
