Padayon ang kampanya sang President Roxas Municipal Police Station sa pagpabilin sang kalinong kag katawhay sa palibot kadungan sang holiday season.
Sa interview sang Bombo Radyo kay Police Major Alfred De Leon, Hepe sang President Roxas Municipal Police Station, iya ginpahayag nga nagalibot ang ila mga katapo agud magpa-alinton sa paglikaw sang paggamit sang palupok kag disiplina sa pag-inom sang makahulubog nga ilimnon.
Suno kay Police Major De Leon, padayon ang ila nga pagbantay sa posible pagpalupok sang mga loose firearms agud malikawan ang aksidente.
Pahayag pa niya, nagapakig-angut man ang ila talatapan sa kada barangay nga magbutang sang lugar kun sa diin lang mahimo maggamit sang palupok.
Nagpanawagan man ang suporta ang natungdan sa tanan nga pumuluyo nga magbuligay sa pagpabilin sang kalinong sa bug-os nga banwa sang President Roxas, Capiz.
