Nahusay na ang problema sang duwa ka liga president sa banwa sang Cuartero sa tunga sang duwa ka mga barangay kapitan nga sanday Valent Villaflor kag Jojo Mayo.
Sa interview sang Bombo Radyo kay Provincial Liga President Nico Yap sang Ivisan nga nag istorya na ang duwa ka mga kapitan kag nagpasugot si Villaflor nga magpanaog sa pwesto bilang liga president sa ila banwa.
Suno pa kay Yap, nga liwaton ang tanan nga mga dokumento sandig sa guidelines sang national liga para batunon ang iya paghalin kag hulaton ang kompirmasyon nagikan sa National Liga para sa pormal nga pagpungko ni Kapitan Jojo Mayo bilang presidente.
Dugang pa ni Yap nga wala nila ginatolerar ang term sharing sa mga kapitan kay nagabayolar ini sa pagsulundan sang liga, apang aminado naman si Yap nga may ara sa gihapon sang mga kapitan nga nagabuhat sini.
Samtang, wala naman sang gintalana nga petsa kung san-o magahalin bilang president si kapitan Valent Villaflor.
