ROXAS CITY – Nagdepensa ang executive department sa mga katapo sang media nga ginpangunahan ni Provincial Administrator Dr. Edwin Monares matapos nga wala pa gin-aprubahan ang Annual Investment Plan subong nga tuig 2020.
Suno kay Monares nga indi mahimo matalakay sang iban nga pondo sang Sangguniang Panlalawigan kun indi maaprubahan ang AIP bangud nagasugod naman ang paggamit sang re-enacted budget.
Ginpanginwala ni Monares ang alegasyon sang Sangguniang Panlalawigan nga may yara sang duplication sa mga proyekto nga ginpainan pa sang pondo sang Provincial Development Council (PDC).
Ginpahayag ni Monares nga wala sang kamatuoran nga wala ginkunsulta ang mga alkalde sa kabanwahanan angut sa mga proyekto nga may yara sang duplication sang mga proyekto.
Ginpanindugan ni Monares nga miyembro sang PDC ang mga alkalde kag sa tion sang ginpatigayon ang PDC meeting wala naman sang may ginkwestiyun ang mga alkalde.
Indi na luyag ni Monares nga magpatigayon pa sang PDC meeting bangud posible nga madamo naman sang pagbag-o nga matabo.
Gindugang pa ni Monares nga nakipaghinun-anon naman ini kay Provincial Engineer Officer Edgar Agana nga magpatigayon sang validation sa mga nasambit nga proyekto nga ginapahayag may yara sang duplication.
Ginpahayag naman ni Monares nga may yara sang adjustments apang wala sang mga irregularidad bangud indi ini maaprubahan kun may yara sang kakulangan ang PDC.
