ROXAS CITY – Nagpatigayon sang pagsinapol ang Provincial Tourism Council kaupod sanday Governor Fredenil “Oto” Castro, stakeholders, kag iban pa nga miyembro sini kun sa diin ginhinalaan ang mga tikang agud mapasanyog ang turismo sang Capiz.
Ini ang ginpahayag ni Board Member Jose Fulgencio “Pepe” Del Rosario, Chairman sang Committee on Tourism sang ma-interview sang Bombo Radyo.
Kaupod sa nasambit nga pagsinapol suno diri ang iya Vice Chair nga si BM Trina Ignacio kag diri sila nag-brainstorming kag gintalakay ang mangin direksyon sang turismo sa probinsya.
Isa sa ila ginhinalaan ang “one town, one product” kun sa diin ang tagsa ka banwa ukon munisipyo ang mangin kilala sa ila isa ka sikat nga produkto nga iga-promote pinaagi sa pagbutang sang mga produkto sa one stop shop ukon bagsakan center.
Posible ipahamtang ini sa banwa sang Panit-an kag Sigma kun sa diin ang mga behikulo nga nagikan sa Aklan kag Iloilo ang maga-untat diri kag magbakal sang produkto.
Kalakip sa gintalakay ang pagpaayo sang Baybay kag street foods agud mas maayo ang mangin eksperyensya sang turismo kag magabalik sa liwat sa probinsya.
Dugang pa ni Del Rosario nga luyag ini matabo ni Gov. Castro agud makapreparar ang pumuluyo sa post pandemic kun sa diin pinaagi sini makabangon kag makaganar ang ang tricycle drivers, sari-sari store owners, vendors, hotel owners, restaurant owners, kag iban pa.
Plano man nila nga magpahamtang sang eco-tourism ukon mga lugar nga pagahiwatan sang nagkalain-lain nga aktibidad sang turista kapareho sa Boracay kag Isla Gigantes.
Apang ang nasambit nga mga tikang para mapaayo ang turismo ang pagapondohan pa lang kag kinahanglan maaprubahan sang Board.
Apisar gamay ang pondo, luyag nila nga dako ang mangin epekto sini antes magtapos ang ila termino sa 2025.
Agud makita sang pumuluyo ang epekto, ipokus ini sa 1 tubtob 3 ka destinasyon.
Suno sa Chairman nga magasinapol sila liwat kaupod na ang tanan nga stakeholders sa Nobyembre 15 agud mahinalaan ang dugang pa nga ideya.
Nagapasalamat si Del Rosario nga gintutukan sang gobyerno probinsyal ang culture and arts bangud man sa tinutuyo sang gobernador nga mas malayo pa ang malab-ot sang turismo sa Capiz.
