ROXAS CITY – Wala ginakunsite sang Punong Barangay sang Poblacion Elizalde, President Roxas ang pag-inom sang mga Baranagay Peacemaking Action Team (BPAT) members sa guwa ukon sa kilid sang Barangay Hall samtang on duty.
Ini ang matapos may nagpalab-ot sang reklamo sa Bombo Radyo kun sa diin ang mga brgy tanod nga on duty ang naga-inom kaupod ang isa ka brgy. kagawad.
Sa pakig-angut sang Bombo Radyo kay Brgy Kapitan Jeffrey ‘Nenet’ dela Cruz, hugot nga ginadumilian sini ang pag-inom sang makahulubog nga ilimnon bangud indi gilayon makaresponde ang mga brgy.tanod nga duty ilabi na kun may emerhensya.
Suno kay PB dela Cruz, may pila ka mga hitabo nga may nakikit-an ini nga baseyo sang botelya sa kilid sang brgy hall apang wala ini niya ginsapak bangud sa pagpati nga posible ginbilin lang ini sang naga-agi.
Ginsiling man sang kapitan, nga magapangatubang sa disciplinary action ang mapamatud-an nga naga-inom sang makahulubog nga ilimnon samtang naga-duty.
Sa pihak nga bahin, ginasiguro man sini nga magapadayon ang ila kampanya batuk sa iligal nga druga bangud aminado ini nga madamo pa sang nababaton nga mga report natuhoy sa mga nagagamit sang iligal nga druga sa amu nga barangay.
