ROXAS CITY – Pabor sa Boston Celtics ang betting odds ukon pustaanay sang mga sports fanatics sa bahin sang Estados Unidos, sa ginhiwat nga Game 6 sa tunga sang Boston Celtics kag Golden State Warriors sa 2022 NBA Finals.
Ini ang ginpahayag ni Bombo International Correspondent Mr. Raffy Fernando, sang mainterview sang Bombo Radyo.
Suno diri, -3.5 ang betting odds sang Celtics nga nagakahulugan pabor sa ila ang kalabanan nga nagtalaya.
Nag-ekspektar ang mga fans nga maglab-ot pa kuntani sa game 7 ang hinampang apang ginsiling sini nga ginkasubo nila nga sa 1st quarter pa lamang, makita na ang pagpangluya kag “inconsistency” sang Celtics kun sa diin masobra 20 ang napagkit nga turnovers.
Mahibaluan nga 103-90 ang katapusan nga score kun sa diin 13 puntos ang abanse sang Warriors nga nangin rason sang ila kadalag-an kag kapiyerdihan naman sa pihak nga team.
Sa pihak nga bahin, ginkasadya man sang mga fans sang Warriors ang kadalag-an bangud na tion nga sa adlaw sang kadalag-an, amu man ang anibersaryo sang grupo kag ang 1st time ni Stephen Curry nga mangin MVP finals.
Ginahulat naman sang mga fans ang schedule sang igapatigayon nga selebrasyon sang GSW.
