ROXAS CITY – Dismayado ang mga Public Utility Vehicle (PUV) drivers kag operators sa Capiz matapos wala ginatugutan sang Land Transportation Franchising and Regulatory Board (LTFRB) ang pagrenew sang ila prangkisa.
Sa interview sang Bombo Radyo kay Mr. Modesto Floranda, Piston National President, suno diri padayon ang pagpang-ipit sang LTFRB sa mga drivers kag operators agud magsulod sa kooperatiba, pamatuod diri ang pagpamalabag sa pagrenew sang ila mga prangkisa.
Pahayag sini, mas nagpigado ang kabuhi sang mga drivers kag operators sang nagsulod sa kooperatiba kag luyag na lang mabawi ang prangkisa.
Mahibaluan ginlibot ni Floranda ang nagkalain-lain nga lugar sa pungsod kalakip na ang Capiz agud hibaluon ang mga problema nga ginapangatubang sang grupo, amu ang sala nga pamaagi para sa pagpatuman sang PUV Modernization Program.
Ginklaro ni Floranda, nga wala nila ginapamatukan ang modernization kundi ang pagsulundan kag proseso sang amu nga programa kun sa diin hawid na sang kooperatiba ang prankisa sang isa ka operator kun magconsolidate ini sa modernization.
Bangud sini, may posibilidad nga malubog sa utang ang mga operators bangud obligado na ini nga maghatag sang P30,000 – P35,000 sa kooperatiba kada bulan sa sulod sang 7 katuig, kag magaresulta sa paglala sang kapigaduhon.
Mahibaluan nga ang isa ka modernized jeep ang nagabalor sa kapin P2.8-M.
Ginapanawagan sang grupo, nga palawigon pa ang deadline nga natalana sa Disyembre 31, 2023 sa pagconsolidate sa nasambit nga programa.
Dugang pa ni Floranda, sa tion nga indi sila pamatian sang ahensya, magapatigayon ang grupo sang nationwide protest agud ipakita ang ila pagkondena sa modernization program.
