ROXAS CITY – Patay ang isa ka person with disability (PWD) matapos ginhatuk-hatok sang labu sang iya kaugalingon nga tiyo sa Barangay Bangon-bangon, Sigma, Capiz.
Nag-angkon sang halos 26 ka mga patal nga pilas sa magkatuhay nga parte sang lawas ang biktima nga si Wildie Balones, matapos ginhatuk-hatok sang labu sang suspek nga si Patrosenio Boluntad.
Sa interview sang Bombo Radyo kay SPO4 Jolito Magbanua sang Sigma Municipal Police Station, ginpahayag sini nga magkaupod nga nag-inom ang duha matapos ang ila nga paggarab sa ulumhan sang hinali na lamang ang mga ini nagbaisay.
Nagtuyo si Balones nga bun-on ang iya nga tiyo apang madasig ini nga nalikawan ni Boluntad.
Bangud diri, ginbuno ni Boluntad ang biktima sa magkatuhay nga porsyon sang lawas nga nagresulta sa iya nga kamatayon.
Gilayon naman nga naaresto ang suspek sa ginpatigayon nga hot-pursuit operation sang mga kapulisan kag natalana nga pasakaan sang panumbungon nga Murder.
