ROXAS CITY – Ginakampanya sang mga katapo sang Provincial Health Office kag Department of Health Capiz nga importante nga mabakunahan ang mga hinuptan nga ido kag kuring, agud malayo nga makaangkon sang rabies.
Sa interview sang Bombo Radyo kay Mr. Mark Louie Atanque, Nurse II kag Provincial HIV kag anti-rabies campaign manager, ginpahayag sini nga importante ang pagpaturok sang anti-rabies vaccine, bangud posible nga makatuga ini sang peligro sa inyo hinuptanan kag sa tawo.
Gin-athag man sini nga ang mga ido ukon kuring ang wala sang rabies sa ila pagbun-ag, kundi kun mahigko ang palibot kag napabay-an ang mga ini kag nangin layaw, diri kag mahimo nga matakdan ukon malatnan sang rabies.
Sa tion man nga makagat ukon makaros sang ido ukon kuring nga may rabies, gilayon nga hugasan ang samad sa running water kag gamit ang anti-microbial soap kag indi pagpaduguon, apang kun nagadinugo kag dako ang samad, takpan ini sang panapton kag madasig nga magpadulong sa Animal bite center agud maturukan sang nagakaigo nga vaccine kag kumpletuhon ini, subong man atipanon ang nakakagat ukon nakakaros nga sapat kag monitoron ang kaugalingon.
Samtang, ginsiling man ni Atanque nga sila sa Capiz PHO kag DOH-Capiz ang nagatan-ay sang libre nga pagbakuna sa anti-rabies vaccine, ginapangabay lang sini nga indi mag self-medicate kag indi magpati sa tandok.
Bukas man suno diri sa pagtan-ay sang libre nga serbisyo sa anti-rabies ang mga Animal bite center, mga Rural Health Unit (RHU) kag sa ospital, kaangay sa City Health Office, Mambusao, Dumalag, Dumarao, Jamindan, kag sa masunod nga binulan magabukas ang Maayon kag Sapian RHU.
