TAPAZ, CAPIZ- Liwat na naman nga natabo ang engkwentro sa tunga sang rebelde nga grupo kag 12th Infantry Battalion sang Philippine Army sa Tapaz, Capiz.
Sa interview sang Bombo Radyo Roxas kay Col. Erwin Rommel Lamzon, Chief sang Public Affairs Office sang 3rd Infantry Division, ginsiling sini nga natabo ini tatlo ka adlaw lang ang makaligad nag nagka-engkwentro man ang duha ka bahin sa pareho man nga banwa sa diin isa ka suldado ang napilasan.
Sa nasambit nga insidente, nakuha sa hideout sang mga rebelde ang nagkalai-lain nga sahi sang mga pampasabog kag kagamitan.
Suno kay Lamzon, indi sila maga-untat tubtob sa indi maubos ang mga rebelde nga grupo nga nagatuga sang peligro sa mga residente.
Nagapanawagan naman ini liwat sa mga rebelde nga mag-surrender na sa otoridad kag pilion ang magpangabuhi sang malinong agud malikawan ang ano man nga kinagamo.
