ROXAS CITY – Hilway na sa katalagman ang 15 tanan ka mga sakay sang sakayang pandagat nga naubon kaina nga pasado alas-12 sa kaaganhon, sa tunga-tunga sang Masbate kag Olotayan nga kadagatan.
Sa interview sang Bombo Radyo kay Richard Dela Cruz, boat captain sang F/B Danrose nga ginapanag-iyahan ni Lito Blances nga residente sang Barangay Culasi, sini nga syudad, suno diri nga kahapon Pebrero 21 sang nagbiya ang mga ini sakay sa nasambit nga sakayan kag padulong sa lawod sang Masbate, apang kaina nga alas-12 sa kaaganhon, nadesisyunan sang boat captain nga magbalik nalang sa syudad bangud naglain ang panahon, apang gulpi nalang naghampak ang tuman kadako nga balod nga gintunaan sang pagka-ubon sang ila ‘palupad’ nga sakayan.
Masuwerte lamang suno diri nga wala sila naglapta kag natigayon nga makakapot sa ‘pataw’ kag nagpalutaw-lutaw sa kadagatan, tubtob mga alas-6:30 sang aga sang nakit-an ang mga ini kag natigayon nga ma-rescue sang duha ka mga rescue boats sang Philippine Coast Guard (PCG).
Dako man ang pagpasalamat sang mga na-rescue nga mangingisda sa opisyal sang Barangay Buntod kag Brgy. Agojo, banwa sang Panay, matapos nga ginhatagan ang mga ini sang panapton kag ginpakaon.
Ang 14 ka iban pa nga sakay sang sakayan, amu sanday:
- Ricky Escinilian
- Ronald Arellano
- John Paul Banato
- Joselito Rubio
- Lendon Torres
- Danilo Fatagani
- Alberto Barlas
- Orly Ara
- Judymar Besonia
- Dodoy Luna
- Bernie Alcala
- Jeonald Lacorte
- Judy Besonia kag
- Judy Besonia Jr.
