Gintalana sang Sandiganbayan Sixth Division ang pagsugod sang trial sa Marso 3 batuk kay former Ako Bicol party-list Rep. Zaldy Co kag 15 ka iban pa may kaangtanan sa gina-alegar substandard P289-million nga flood control project sa Naujan, Oriental Mindoro.
Sa mando nga may petsa nga Pebrero 10, 2026, ginpahayag sang korte nga natapos na ang hearing sa bail petition sang siyam ka anay opisyal sang Department of Public Works and Highways (DPWH), matapos gin-anunsyo sang prosecution nga indi na ini magpresentar sang testimonya biang ebidensya.
Ginhatagan man sang tig-duha ka adlaw ang prosecution kag depensa agud magsumiter sang ila tagsa ka mga dokumento antes i-resolba ang bail petition.
Ang pagpresentar sang ebidensya sang prosekusyon ang gintalana man sa Marso 3 kag 5, kag magapadayon kada Martes kag Huwebes sa alas 8:30 sang aga.
Sa bail hearing, nagtestigo si Victoriano Acosta sang Commission on Audit (COA) Region IV-B nga nagpaguwa sang notice of disallowance ang komisyon nga P84-million gikan sa P289-million nga pondo bangud sa gina-alegar indi pagsunod sa project plan kag specifications.
Apang, ang depensa nagsiling nga mahimo gihapon ini i-apelar kag indi makabig nga katapusan nga desisyon, isa ka kamatuoran nga ginkilala sang auditor.
