Ginsiguro sang Sangguniang Panlungsod nga makabaton sang cash assistance ang mga tricycle driver sa syudad sang Roxas gikan sa gobyerno.
Sa interview sang Bombo Radyo kay Roxas City Councilor Rey Magallanes, chairman sang committee on transportation, iya ginpahayag nga may pagabatunon nga fuel subsidy ang 4-wheeled public utility vehicle kaangay sang jeepney, samtang cash assistance naman ang pagabatunon sang mga tricycle driver sa idalum sang Assistance to Individual in Crisis Situation ukon AICS sang DSWD.
Suno sa iya, wala pa sang ordinansa nga nagatugot sa pagpataas sang anuman nga sahi sang pagdugang sang pamasahe nga makabig illegal.
Pahayag pa niya, ginadihon na sang ila nga talatapan ang pagpangolekta sang mga data sang benepisaryo sang mga TODA agud nga pag-abot sang cash assistance sang DSWD magaumpisa na sa pagpanagtag.
Nagapanawagan man ang natungdan sang pag-intindi kag kooperasyon sang mga driver bangud ginahimo man sang gobyerno ang tanan agud man nga mapahagan-hagan ang krisis nga ginapangtubang sang mga ini.
