ROXAS CITY-Natalana nga imbestigaran sang Sangguniang Panlungsod ang ginaalegar “fish kill” nga natabo sa mga fish cages sa Cadimahan River nga sakup sang Barangay Dayao, Culasi kag Libas, Roxas City.
Sa interview sang Bombo Radyo kay City Councilor Moreno Moreng Gonzaga, chairman sang Committee on Fisheries and Aquatic Resources ginpahayag sini nga ginkasugtan sa ginpatigayon nga committee meeting sang duha ka mga komitiba nga padulongan kag imbestigaran ang natabo sa nasambit nga suba.
Nahibaluan nga base sa inisyal nga pagpangusisa sini sa mga opisyales sang Barangay Culasi, ginaalegar nga oil spillage gikan sa mga sakayan nga nagadungka kag naga-change oil sa nasambit nga suba ang gintunaan sang fish kill.
Apang, luyag pa nga usisaon sang amo nga konsehal kun hungod ukon aksidente gid lamang ang natabo nga oil spillage.
Natalana man nga ipatawag sang konseha ang mga tag-iya sang amo nga sakayan angut sa natabo.
Nagpaandam naman si Gonzaga nga may yara sang nagakaigo nga penalidad sa tion nga mapamatud-an nga hungod ang nasambit nga oil spillage.
Mahibaluan nga pila ka mga fish cage operator ang nagpalab-ut sang reklamo sa Bombo Radyo natuhoy sa fish kill nga natabo sa nasambit nga suba
