Naghingyo ang newly-installed Department of Public Works and Highways Secretary Vince Dizon sa Department of Justice nga mag-issue sang immigration lookout order batuk sa pila ka mga opisyal sang ahensya kag mga contractor nga naangot sa nagapadayon nga imbestigasyon sa maanomaliya nga flood control projects.
Sa sulat, ginpahayag ni Dizon kay Department of Justice Secretary Jesus Crispin Remulla nga ang issuance sang immigration lookout bulletin order batuk sa mga indibidwal ang nagakadapat nga mapatuman gilayon agud indi ma delay ang pagpasabat sa mga tawo nga may kahilabtanan sa mga palpak nga proyekto.
Masobra 20 ka mga pangalan ang gin-request ni Dizon nga ilakip sa immigration bulletin.
Suno sa DPWH Secretary, ginahingyo man sini ang Bureau of Immigration nga gilayon nga ipahibalo sa ila kag iban pa nga law enforcement agencies ang ano man nga impormasyon may kaangtanan sa travel sang mga indibidwal nga yara sa sulat.
Pahayag ni Dizon, ang tikang nga pag-request sang immigration lookout bulletin order ang kabahin sang direktiba ni President Ferdinand Marcos Jr.
Dugang pa sang natungdan, magahatag man siya sang mandu sa pagpauntat anay sang bidding sa tanan nga locally funded projects sa pungsod.
