ROXAS CITY – Simple lamang ang selebrasyon sang kapiyestahan ni Sr. San Juan de Bautista sa Barangay Baybay, Roxas City subong nga adlaw.
Ini ang ginpahayag ni Punong Barangay Reynaldo Magallanes sang mainterview sang Bombo Radyo.
Suno kay Magallanes nga bangud sang ginapangatubang sa karon nga coronavirus disease (COVID-19) pandemic, ginpaiway nila ang mga aktibidad nga masami ginapatigayon kada tuig.
Magluwas na lamang sa religious activity kun sa diin may ginpatigayon sa gihapon nga misa apang ginlimitahan lamang ang mga nagtambong kag gin-obserbar ang health protocols kapareho sang social distancing kag pagsuksok sang facemasks.
May duha lamang ka aktibidad nga ginpatigayon suno kay Magallanes sa bisperas sang kapiyestahan kalakip na ang parada sang patron kun sa diin duha lamang ka baruto ang gingamit kag fireworks display.
Nagpanugyan man ini sa mga residente nga indi magpaligo sa baybayon sandig sa mandatu ni City Mayor Ronnie Dadivas.
Ginadumilian man nga ginapaguwa ang mga indibidwal nga naga-edad sang 20 anyos panubo kag mga senior citizens.
May mga sunata man nga ginapatukar ang konseho sang barangay agud maghatag sang kalingawan sa mga pumuluyo.
