Nanindugan si Senate Deputy Minority Leader Sen. Risa Hontiveros nga may maathag nga legal nga basehan kag bastante nga justification ang Pilipinas agud isungka sa Estados Unidos ang lider sang Kingdom of Jesus Christ (KOJC) nga si Pastor Apollo Quiboloy.
Suno sa senador, apisar nga may pending nga kaso sa Pilipinas si Quiboloy, mahimo sa gihapon nga dal-on sa US agud una nga atubangon ang iya mga kaso sa Estados Unidos kag ibalik sa Pilipinas agud manabat sa iya mga krimen nga nakomiter sa pungsod.
Dugang pa ni Hontiveros nga may mga biktima man ang pastor sa US nga suno sa iya madugay na nga nagahulat sang hustisya kag indi husto nga palawigon pa ang ila paghimakas bangud ini ang pagpalantang lamang sa hustisya nga luyag malab-ot sang mga biktima.
Ang kasugtanan sang gobyerno sa temporaryo nga pagsungka ang isa man ka pamaagi agud mabuligan ang mga biktima sa Amerika kadungan sang pagpasiguro nga indi madula ang mga kaso nga gina-atubang sang pastor sa Pilipinas suno sa iya.
Samtang ginhatagan pagtamod ni Hontiveros kon paano ginatinguhaan ni Quiboloy nga gamiton ang iya impluwensya kag kwarta agud malikawan ang iya pagbista.
Sa pihak sini, ginpahayag nga wala pa nakabaton sang pormal nga extradition request ang Department of Justice (DOJ) halin sa US Embassy.
