ROXAS CITY – Patay ang isa ka senior citizen matapos ma-trap sa iya balay nga nasunog sa Brgy. Balaring banwa sang Ivisan, takna alas 3:00 kaina sang hapon.
Ginkilala ang biktima nga si Cecilia Salbidar, 92-anyos residente sang nasambit nga barangay.
Sa impormasyon nga nakuha sang Bombo Radyo sa Ivisan-BFP, nga base sa panaysayon sang witness nga ginkilala kay Nonie Orlandes, ginpahayag sini nga nagapugo siya sang iya humay nga ginbulad sang makabati ini sang tingog sang biktima nga nagapangayo sang bulig kag nakita man sini nga naga-arab arab na ang kalayo sa amu nga balay.
Mahibaluan, nga kun hapon temprano pa nagaluto ang biktima bangud wala man ini sang upod sa iya puluy-an kag ang ginagamit sini nga gatong amu ang pal-ay sang lubi.
Posible nga nagikan sa dapog ang kalayo kag madasig nga naglapta kun sa diin totally burned gid ang puluy-an sini.
Ginabanta nga yara sa 80 tubtob 100 metros ang kalayuon sang balay sang biktima sa mga residente.
Padayon naman ang imbestigasyon sang BFP-Ivisan sa nasambit nga hitabo kag agud mahibaluan kun pila ang nangin kahalitan sang nasambit nga sunog.
Sa karun, yara na ang bangkay sang biktima sa isa ka punerarya sa banwa sang Ivisan.
