ROXAS CITY – Personal nga nagpadulong sa talatapan sang Roxas Component City Police Station, ang isa ka service crew agud magreport angut sa ginapahayag pagpanggold-up sa iya sa may bahin sang Fuentes Drive, Barangay IX, Roxas City.
Ginkilala ang biktima kay Eduardo Ambion, 52-anyos kag residente sang Barangay Cudian, Ivisan Capiz apang temporaryo nga nagapuyo sa Legaspi St., Barangay II, sining syudad.
Sa impormasyon nga nakuha sang Bombo Radyo nagikan sa Roxas Component City Police Station, ginapahayag nga magapauli na kun tani ang biktima sa iya boarding house sakay ang tricycle nga nagaduag pula kag ginamaneho sang lalaki nga nakasuksok sang hoody jacket, facemask.
Suno diri pag-abot ni Ambion malapit sa iya boarding house, hinali na lamang nga may nagpalapit sa iya nga isa ka lalaki nga nakasuksok sang hoody jacket kag facemask sakay sang tricycle nga iya ginsakyan kag hinali ini nga gintayaan sang kutsilyo kag nagdeklarar nga hold-up.
Bangud sini, gilayon nga naglumpat ang biktima sa dalan kag nagdalagan rason agud mapaslawan ang mga wala makilan-an nga suspek nga tabanon ang bag sini nga naga-unod sang P5,000.00 nga cash kag pila ka mga importante nga dokumento.
Sa karun, padayon pa ang pagpatigayon nga imbestigasyon sang mga kapulisan angut sa nasambit nga insidente.
