ROXAS CITY – Magasugod na subong nga adlaw Pebrero 17 ang pagselebrar sang kwaresma ukon 40 diyas nga pagpuasa kag penitensiya samtang nagahulat sang pagkabanhaw ni Ginoong Hesukristo.
Ini ang kadungan sang paghiwat sang Miyerkules Badlis.
Sa interview kay Rev. Fr. Jose Arturo Emilio O. Arbatin, tagpamaba sang Archdiocese sang Capiz nga ang pagpatigayon sang pagbadlis amo ang pagpahanumdom sa aton hinalinan.
Ini ang pahanumdom nga tinguhaan naton nga mga tumuluo nga mag obserbar sang tatlo ka poste sang kwaresma nga mangin giya agud mangin mabinungahon ang pagsaulog sang kwaresma.
Ini ang mga masunod:
1. Pangamuyo,
2. Puasa (pagpaindi sa huyog sang aton nga lawas) puasa sa pagkaon, pagginawi nga magpakasala,
3. Pagbulig – pagdumdom sa aton isigkatawo, indi lamang materyal kundi presensiya nga makabulig sa isig katawo.
Subong nga panahon sang pandemya, ginpakamaayo sang aton simbahan nga sa baylo nga pagpalhit sang abo sa agtang, nga aton kinaangdan, sa karon, iga budbod ang abo’ sa ulo ukon alimpudwan.
Dugang pa ni Fr. Arbatin nga may kinalain ang fasting sa abstinence, bangud ang fasting amu ang pag disiplina, gina-ibanan ang kantidad sang normal nga ginakaon, isa ka beses sa isa ka adlaw ang pagkaon sang pabusog kag paga-ibanan ang 2 ka mga nabilin nga meals, sarang ini nga ginapatigayon kada Miyerkules Badlis kag Biyernes Santo.
Sarang naman ini nga pagasundon sang naga-pang edaron 18-anyos tubtob 59-anyos.
Samtang ang Abstinence – pagdumili nga indi magkaon sang karne kag manok. Ini gina hiwat sa miyerkules badlis, kada bernes kag bernes santo. ini gina buhat sang mga indibidwal nga naga pang edaron sang katorse pataas.
Apang, gina klaro diri ni Fr. Arbatin nga may exempted sa fasting kag abstinence, amu ini ang may mga sakit, mga senior citizens kag mga bata.
May ara man sang misa sa pagbadlis sa kinari-sari nga mga Parokya diri sa siyudad kag probinsiya sang Capiz.
Sa adlaw sang Pagbadlis, gina paalinton ang mga tumuluo nga Katoliko nga mag tinguha nga maka tambong sa balaan nga misa kag hugot nga iga patuman ang health protocol sang aton DOH.
