ROXAS CITY – Nagpatigayon sang Simulation exercise ang City kag provincial Comelec office nga nagpanguna sa aktibidad nga ginpasakupan sang mga kapulisan, Bureau of Fire Protection, City Disaster Risk Reduction and Management Office (CDRRMO), Provincial Disaster Risk Reduction and Management Office (PDRRMO), barangay officials kag iban nga volunteer groups bilang preparasyon sa anuman nga insedente nga posible mahinabo kasunod sa pagsugod na buwas nga adlaw sang filing sang Certificate of Candidacy (COC) sang mga kandidato nga magapadalagan sa 2022 National and Local elections.
Ginpahayag ni Police Lt. Col. Aron Palomo, hepe sang Roxas City PNP, katuyuan sini nga lihok nga ma-preparahan ang posible pagluntad sang indi malikawan nga mga insedente kasubong sang bomb threat, shooting, harassment kag ramble sa tunga sang mga supporters sang kandidato nga gilayon respondihan sang mga otoridad.
Diri makita ang kadasigon sa pagresponde sang mga kapulisan sa mga insedente.
Ginpatigayon ang re-enactment sa isa ka daku nga mall nga magaserbe nga venue sang filing sang COC sang mga kandidato sumugod buwas nga adlaw tobtob sa Oktubre 8, 2021.
