Nakumpiskar ang ginapatihan smuggled cigarettes sa isa ka establisyemento sa Taft Street Barangay III, syudad sang Roxas.
Ginkilala ang mga nagkaladakpan nga sanday alyas Jeff, 25-anyos, residente sang Barangay Cagay, Roxas City kag alyas Max, 79-anyos residente sang nasambit nga lugar.
Sa impormasyon nga nakuha sang Bombo Radyo sa Roxas City Police Station, ginpahayag nga nakuha sang mga otoridad ang 5 tanan ka mastercases sang Carnival, 5 ka RGD kag balor P177,000 nga buy bust money kalakip na ang P500 nga subscribed money.
Dugang pa nga nakumpiskar sa duha ka persona amo ang 14 tanan ka master cases sang Mighty, 1 ka fortune, 15 ka master cases sang camel, 8 ka Chesterfield, 6 ka H&P, 8 ka Carnival kag 3 master cases sang RGD.
Sa kabug-usan yara sa P3.9M ang balor sang mga nakumpiskar nga illicit kag smuggled nga sigarilyo sang mga otoridad sa duha ka suspetsado.
Sa karon, yara na sa paghinakop sang Roxas Component City Police Station ang mga suspetsado para sa nagakaigo nga disposisyon, samtang natalana naman nga pasakaan sang kaso nga paglapas sa RA 10863 ukon Custom Modernization and Tariff Act.
