ROXAS CITY – Gindeklarar na ang state of calamity sa Sicogon island sa banwa sang Carles, Iloilo bangud sa dengue outbreak.
Ini ang ginkompirma mismo ni Carles, Iloilo Mayor Siegfredo Betita sa interview sang Bombo Radyo Roxas.
Mahibaluan nga may yara sang tatlo ka mga barangay sa nasambit nga isla kun sa diin sa Barangay San Fernando, naglab-ot na sa 60 ang nabiktima sang amo nga balatian rason nga ginpaidalom ini sa state of calamity, 8 sa Barangay Alipata kag 3 naman sa Barangay Buaya.
Magluwas diri temporaryo man nga ginpauntat ang pagbaton sang mga turista sa amo nga isla bangud sa peligro nga dala sang dengue outbreak sa lugar.
Tuman man ang pagpasalamat sang alkalde kay Iloilo Governor Arthur Defensor Sr. bangud sa paghatag sang libre nga hospitalization sa Malbog District Hospital sa mga pasyente nga may dengue gikan sa isla sang Sicogon.
Mahibaluan nga ang nasambit nga isla ang isa sa pinakasikat nga tourist destination sa probinsiya sang Iloilo kun sa diin opisyal ini nga ginbuksan sa mga turista sadtong tuig 2012.
