ROXAS CITY – Nangin epektibo ang sunod-sunod nga programa sang Social Security System nga Run After Contribution Evaders ukon RACE program.
Sa interview sang Bombo Radyo kay Atty. Bernardo Dofitas Jr., Vice President sang Visayas West 2, Division, katuyuan sang amu nga programa agud mapahanumdom ang mga employers nga tumanon ang ila obligasyon nga bayaran ang social security contribution sang ila mga empleyado.
Suno kay Atty. Dofitas, nangin positibo ang response sang mga employer sa nasambit nga programa kun sa diin makit-an sa mga ini nga welcome ang ila approach kag mas prefer nila nga bisitahon kaysa padalan-an sang notice.
Dugang pa sini, indi lamang sa syudad sang Roxas kundi sa bug-os nga pungsod ginmandu sang SSS nga ipatigayon ang RACE program agud mabuligan ang mga employer sa pagtuman sang ila obligasyon.
Pahayag pa sini nga naka-conduct na sang ikaapat nga RACE sa syudad sang Roxas kag madamo sang mga employers ang naga-comply.
Dugang pa diri nga target sang SSS nga makapatigayon sang isa ka RACE operation kada bulan ukon tatlo ka operasyon kada kwarter sa kada branch.
