Ginabulubanta nga naglab-ot sa kapin P26,000 ang nangin kahalitan nga ginbilin sang nagluntad nga sunog sa Sitio Arellano, Barangay Pawa, Panay, Capiz.
Mahibaluan nga ang totally burned nga puluy-an nga nasunog ang ginapanag-iyahan ni Vicente Bandejas, 49-anyos, samtang ang partially burned naman ang ginapanag-iyahan ni Richard Baylon.
Sa interview sang Bombo Radyo kay SF01 Rallielou Besana, chief intelligence and investigation section sang Bureau of Fire Protection- Panay, ginapahayag nga pasado alas 3:26 sang hapon nakabaton sila sang tawag kag gilayon naman ini nga ginpadulungan ang lugar.
Suno pa nga human sa light materials ang nasambit nga mga puluy-an rason nga madasig nga ginlamon sang kalayo.
Dugang pa nga nagdugay ang amo nga sunog malapit 30 minutos kag gindeklarar nga fire-out takna alas 3:54 sang hapon.
Sa karon, nagapadayon pa ang imbestigasyon sang mga katapo sang Bureau of Fire Protection- Panay, agud mahibaluan kun ano ang gintunaan sang nasambit nga sunog.
