ROXAS CITY, CAPIZ- Napabilin nga bastante ang supply sang tubig sa probinsya sang Capiz, matapos ang pag-igo sang Bagyo Opong.
Sa interview sang Bombo Radyo kay Mark Vincent Bernas, Information Officer sang Metro Roxas Water District Public Information Office, iya ginpahayag nga napabilin sang ila nga team ang normal nga operasyon sa pihak sang pag-igo sang amo nga bagyo.
Suno sa iya, apisar nga nagabagyo, wala sang kun ano man nga linya sang tubig ang nawasak kag may nakapreparar sila nga generation set agud panaglitan mag-brownout, padayon sa gihapon ang paghatag sang amo nga serbisyo sa mga kunsumidor.
Pahayag nya, sa pihak sang amo nga mga preparasyon kag paghatag sang serbisyo, nakabaton sa gihapon ang ila nga talatapan sang mga reklamo nagikan sa pila ka mga kunsumidor.
Sa banwa sang Panay, pila ka mga residente ang nagreklamo nga mahinay ang tubod sang tubig sa tagsa nila ka mga gripo. Gilayon naman ini nga ginhatagan sang igtalupangod sang ila nga technical team kag sa subong, may yara na sang development sa amo nga pagkaayo sang linya sang tubig.
Nahibaluan nga may pila ka mga linya sang tubig ang nagka-leakage apang suno sa ila nga technical team, minimal lang man kag madasig nga kaayuhon.
Nagpasalig naman ang natungdan nga magapadayon sa pagkay-o ang ila nga team agud masiguro nga mahatag sang maayo ang serbisyo sang patubig sa tagsa ka mga kunsumidor sa probinsya sang Capiz.
Interviewed by Bombo Francis Biñas
