Ginkumpirma sang Department of Justice nga wala nakaabot si Orly Regala Guteza sa natalana sini kuntani nga pagpakigsapol kay Department of Justice Sec. Jesus Crispin Remulla.
Si Guteza ang ginakabig nga ‘surprise witness’ nga nagpahayag sa senado nga nagdul-ong siya sang maleta nga may unod nga kwarta kanday anay House Speaker Martin Romualdez kag Ako Bicol party-list Rep. Zaldy Co.
Ginpresentar ni Senator Rodante Marcoleta si Guteza bilang testigo sa Blue Ribbon Committee hearing sang nagligad nga Huwebes.
Suno kay DOJ Spokesperson Mico Clavano, natalana kuntani nga mag-abot si Guteza sa ahensya kahapon, ‘las 9 sa aga matapos ini nga maghingyo nga luyag niya malakip sa Witness Protection Program bangud sa kakulba sa iya seguridad kag sa safety sang iya pamilya.
Pahayag niya, ang mga contractor lang nga sanday Sarah Discaya kag Sally Santos amo man si anay Bulacan first district engineer Henry Alcantara ang nag-abot sa ahensya agud ma-usisa ang ila aplikasyon nga mangin testigo sa kaso nga ipasaka nahanungod sa ginaalegar kurapsyon sa flood control funds.
Ginpahayag man sang opisyal nga nagapatigayon na sang imbestigasyon ang DOJ tuhoy sa impormasyon nga ginpanginwala sang abogado nga nakapirma sa affidavit ni Guteza nga siya ang nag-notarize sang dokumento.
