ROXAS CITY – Ginklaro sang pamunuan sang City Disaster Risk Reduction and Management Office (CDRRMO) nga indi pa sang confirmed coronavirus disease (COVID-19) case kundi suspect case pa lamang ang napatay nga persona sa Luna Novicio, Barangay 1, Roxas City.
Ini ang ginpahayag ni (CDRRMO) Head Dennis Saneo sang mainterview sang Bombo Radyo.
Suno kay Saneo, wala sang kamatuoran nga nag-positibo sa COVID-19 ang napatay nga 76 anyos nga tigulang nga babaye sa amo nga lugar bangud ginahulat pa ang resulta sang iya nga real-time polymerase chain reaction (RT-PCR) test.
Napatay ini bangud sa balatian nga community-acquired Pneumonia.
Gindala ini sadtong Setyembre 1, Martes nga adlaw, sa isa ka pribado nga ospital kag ginbawian ini sang kabuhi pagka-Miyerkules, Setyembre 2.
Bilang pagsunod sa health protocol, gilayon nga ginmandu ang immediate burial sa bangkay sang napatay nga indibidwal bangud isa ini ka suspect case.
Ginkompirmar man ni Saneo nga ginpabutang sang baral sang mga barangay officials ang amo nga lugar agud malimitahan ang pagguwa sang pamilya sang nasambit nga suspect case samtang ginahulat ang resulta sang iya swab test.
