ROXAS CITY – Magatakop na ang temporary suspension sa pagpauli sang mga Locally-Stranded Individuals kag Returning Overseas Filipinos sa probinsiya sang Capiz sa maabot nga Setyembre 22, 2020.
Ini ang ginkompirmar ni Provincial Disaster Risk Reduction and Management Office (PDRRMO) Head Judy Grace Pelaez sang mainterview sang Bombo Radyo.
Suno kay Pelaez nga magabalik na ang pagpauli sang mga ini sa Setyembre 23 kun sa diin mahimo na makadungka ang Starlite Vessel nga may sakay nga mga LSI’s nagikan sa Batangas Port padulong sa Culasi Port.
Samtang, Setyembre 26 naman magapauli sa probinsya ang mga LSI’s nga sakay sang 2Go Vessel.
Sa bahin naman sang mga LSI’s nga magasakay pinaagi sa Airlines, Setyembre 24 magaabot ang flight sang Cebu Pacific samtang Setyembre 28 naman ang flight sang Philippine Airlines (PAL) sa Roxas City Airport.
Aminado naman si Pelaez nga humalin sa ginpatuman ang suspensyon sa pagpauli sang mga LSI’s gani indi lipod nga may yara sa gihapon sang mga indibidwal nga makalusot kag makapauli sa probinsya.
Dugang pa sini nga nagasakay patago ang mga ini sa mga trucking ukon illegal nga nagapauli rason nga gilayon man nga naga-report ang mga opisyales sang tagsa ka mga barangay kun may yara sang indibidwal nga nagikan sa iban nga lugar.
Nagpasalig naman si Pelaez nga ipabilin sa gihapon ang hugot nga koordinasyon sang ila talatapan sa tagsa ka mga Local Government Units (LGU’s) natuhoy sa pagpauli sang mga LSI’s, ROF’s kag APOR.
Matandaan nga ginhatagan sang 14 day moratorium ang probinsya sa pagbaton ukon pagpauli sa mga LSI’s kag ROF’s.
