ROXAS CITY – Ginkompirmar sang pamunuan sang Traffic Management Unit (TMU) nga magasugod na ang ila pagpatuman sang City Ordinance No. 044-2020 ukon mandatoryo nga pagsuksuk sang facemask kag faceshield sa siyudad.
Sa interview sang Bombo Radyo kay Mr. Gonzalo Andrada, Head sang Traffic Management Unit, ginpahayag sini nga sa maabot nga Lunes, Setyembre 28 magasugod na ang ila pagpanakup sa mga indibidwal mga wala nagasuksuk sang facemask kag faceshield sa pampubliko nga mga lugar.
Nagpaandam si Andrada nga may yara sang multa ang sin-o man nga madakpan nga wala nagasunod sa ordinansa.
Ang madakpan ang sarang nga magabayad sang P500 nga multa para sa first offense, P3,000 para sa second offense kag P5,000 para sa third offense.
Kun wala sang kuwarta ang madakpan,mahimo man nga magbayad pinaagi sa community service.
Nahibaluan nga ginadumilian naman ang pagsakay sa mga pampubliko nga salakyan nga wala sang ginasuksuk nga facemask kag faceshield.
Hugot man nga ginadumilian ang pagbiyahe nga wala sang ginasuksuk nga facemask kag faceshield para sa mga driver.
