Gilayon nga gin-aksyunan sang pamunuan sang Traffic Management Unit (TMU) sang nahibaluan ang reklamo sang isa ka estudyante nga babayi nga ginapahayag ginbastos sang isa ka tricycle driver.
Sa interview sang Bombo Radyo kay Mr. Gonzalo Andrada, Head sang TMU, ginpahayag sini nga indi ang mismo nga tag-iya kag driver sang tricycle nga ginareklamo nga may plaka nga 3278 ang naga-drive kundi ang iya bata nga ginkilala kay Nonoy, 28-anyos.
Dugang pa sini nga sang gin-usisa na sini si Nonoy kun ano ka matuod ang alegasyon nga ginahaboy sa iya. Sa una wala pa sini gin-ako ang reklamo batuk sa iya apang sa ulihi, gin-ako na sini nga ang tanan nga ginpanghambal sang biktima sa iya social media post, matuod.
Gin-ticketan ang amo nga driver sang driving without license, arrogant and discourteous towards passengers kag expired OR/CR kag may kabug-usan nga P1,700 ang ginhatag nga penalidad.
Panugyan ni Andrada sa mga tricycle driver nga mangin matinahuron sa mga pasahero kag idul-ong sang safe sa ila padulungan.
