MADALAG, AKLAN – Patay ang isa ka construction worker matapos nga ginbuno sang iya katrabaho sa Brgy. Catabana, Madalag, Aklan sang Nobyembre 24 sang gab-i.
Sa impormasyon nga nakuha sang Bombo Radyo, ginkilala ang biktima nga si alyas Rommel, yara sa legal nga pang-edaron kag residente sang Brgy. Bolo, Roxas City, samtang ang ginatudlo nga suspek ang ginkilala kay alyas Matthew nga residente naman sang probinsya sang Antique.
Sa inisyal nga imbestigasyon sang Madalag Municipal Police Station, ginpahayag nga naghagaday ang mga kaupdanan sang suspek kag biktima nga magpaligo sa suba tubtob nga may natabo nga pag-inum-inom.
Sang pareho na ang mga ini nga yara sa impluwensya sang makahulubog nga ilimnon, may nagluntad nga pagbinaisay sa tunga sang suspek kag biktima kag hinali nalang ginbuno sang suspek ang biktima sa dughan sang makaduwa ka beses rason nga gintunaan sang iya kamatayon.
Dugang pa sini, ginpahibalo pa sang suspek sa mga kaupdanan sini nga nakabuno siya kag gilayon ini nga nagpalagyo sa wala matumod nga direksyon matapos makumiter ang krimen.
Samtang nadakpan naman ang suspek kahapon nga adlaw Nobyembre 25 kag nagapabilin sa kustodiya sang Madalag PNP kag posible nga magapangatubang sang kaso nga murder.
