Dakop ang isa ka lalaki nga tumandok sang banwa sang Tapaz matapos ginserbihan sang warrant of arrest sa Barangay Poblacion, Calinog, Iloilo.
Ginkilala ang akusado kay alyas “Rolly”, yara sa legal nga pang-edaron kag residente sang Brgy. Wright, Tapaz, Capiz.
Sa impormasyon nga nakuha sang Bombo Radyo nagikan sa Tapaz Municipal Police Station, ginapahayag nga natigayon nga madakpan si Rolly pinaagi sa gintingub nga pwersa sang Tapaz MPS kag Calinog MPS.
Ang warrant of arrest ang gin-isyu kag ginpirmahan ni Judge Ronald Portigo Melliza Jr., Municipal Circuit Trial Courts, 6th Judicial Region, Calinog, Bingawan, Iloilo, kag napetsahan sadtong Setyembre 17, 2024.
Nagapangatubang sa kaso nga paglapas sa Presidential decree 1602 ukon Anti-Gambling Law ang nasambit nga akusado kag ginrekomendaran sa balor nga kapin P10,000 nga piyansa para sa iya sini nga temporaryo nga kahilwayan.
Sa karon, yara na sa Calinog Municipal Police Station ang nasambit nga akusado para sa nagakaigo nga disposisyon.
