ROXAS CITY—Nagpaguwa na sang inisyal nga imbestigasyon ang traffic section sang Roxas City PNP sa nagluntad nga aksidente nga ginkamatay sang apat ka indibidwal kag ginkapilas sang duha ka iban pa kalakip ang driver nga indian national.
Suno kay SPO2 Anthony Bibit nga human error ang natabo bangud nagsaka sa gutter sang center island ang Mirage Mitsubishi nga ginamaneho ni Gurparka Singh alyas Happy.
Kasunod sini nadulaan sang kontrol ang driver sa manibela sang salakyan tason nga nagbunggo ini sa tatlo ka puno sang lubi.
Samtang, ginakabig nga ikaduha nga kabuhi sang abyan sang indian nationa nga isa ka tricycle driver ang pagpamalibad sini nga mag-upod sa road trip.
Suno kay Makmak, gin-imbitahan siya ni Gurparka Singh alyas Happy nga mag-upod sa ila nga road trip, apang nagpamalibad bangud nakapoy kag natuyo sa pagbiyahe sang tricycle.
Bangud wala nag-upod si Makmak, ginpilit ni Happy nga mag-upod sa ila si Patrick James Llave, isa sa mga napatay sa nasambit nga aksidente nga sadto nga tion, bag-o lamang nakakaon sang kaldo.
Ginkakibot na lamang ni Makmak sang mahibaluan nga naaksidente sanday Happy kaupod ang iban nga nagkalamatay nga sanday Llave, Jomer Baes, John Bert Chinggo, Bryan Macalintal kag ang ginabulong pa sa karon nga si Joy Gico.
