ROXAS CITY – Naglab-ot sa kapin P108,000 ang balor sang droga nga nakuha sa posisyon sang tatlo ka persona sa ginpatigayon nga drug buybust operation sa Burgos St., Barangay Tanque, Roxas City.
Matandaan nga natigayon nga madakpan pinaagi sa gintingub nga pwersa sang Philippine Drug Enforcement Agency (PDEA) Capiz kag Roxas City PNP ang tatlo ka persona nga sanday alyas “Rogel”, 40-anyos, nga residente sang Brgy. Banica apang temporaryo nga nagapuyo sa Brgy. Tanque, alyas “Daryl”, 29-anyos, kag alyas “Paulo”, 29-anyos nga lunsay mga residente sang Brgy. Tanza sini nga syudad.
Nakuha sa posisyon sang mga naaresto ang onse (11) tanan ka sachet sang ginaalegar iligal nga droga nga may kabug-aton 12 grams kag may standard drug price nga Php 108,000.00, 500 pesos nga buybust money kag mga drug paraphernalia.
Madugay na suno diri nga gina-monitor sang PDEA sa iligal sini nga aktibidades ang ginakabig nga high value individual (HVI) nga suspect.
Kaso nga paglapas sa Republic Act 9165 ukon Comprehensive Dangerous Drugs Act of 2002 ang igapasaka sang otoridad sa mga suspetsado.
Sa karon, nagapabilin sa prisohan ang mga suspect para sa nagakaigo nga disposisyon.
