ROXAS CITY – Natigayon nga maka-comply ang Vallacar Transit Incorporated sang mga rekisitos nga kinahanglan para dalayon nga makapanumbalik sa pagbiyahe ang ila mga ceres bus nga may ruta Roxas City-Iloilo vice versa.
Ini ang ginpahayag ni Roxas City Mayor Ronnie Dadivas sang mainterview sang Bombo Radyo.
Suno kay Dadivas nga nagpakigsapol sa iya ang mga representative sang (VTI) kag diri niya ginpresentar ang mga rekisitos kag dokumento nga kinahanglan nila masumiter.
Gilayon man suno diri nga nag-comply ang VTI kun sa diin magluwas sa ila letter of request, nagsumiter sila sang listahan sang bus kag plate numbers nga magabiyahe kag special permits gikan sa Land Transportation Franchising and Regulatory Board.
Kinahanglan man suno sa alkalde nga ma-comply ang minimum health standards sa pag-akomodar sa mga pasahero.
Sa pagtsekyar sang alkalde kag natigayon nga makumpleto sang VTI ang mga ginapa-comply sa ila, gilayon man ini nga nagpahanugot sa pagpanumbalik sang biyahe sang mga ceres bus.
