ROXAS CITY – Indi pa makahatag sang komento ang bise gobernador natuhoy sa gintukod nga fact finding committee ni Governor Esteban Evan Contreras II, nga maga-imbestigar sa kontrobersiya nga ginadalahigan sang Roxas Memorial Provincial Hospital sa diin apat ka mga pasyente ang napatay sa ICU sang tinalikdan nga bulan sang Disyembre.
Ini ang ginpahayag ni Capiz Vice Governor Jaime ‘Mitang’ Magbanua sang mainterview sang Bombo Radyo.
Suno kay Magbanua wala pa sini makita ang kaundan sang executive order rason nga wala ini sang ideya kun sin-o ang nagabug-os sang komite.
Apang pag-abot sa Sangguniang Panlalawigan mayorya sa ila ang nagapati nga kinahanglan ini mahatagan sang pagtamud bangud ginpalab-ot ini nga concern sa ila departamento.
Bangud diri, hibaluon sang Sangguniang Panlalawigan kun ano ang gintunaan sang kamatayon sang mga pasyente kag mapangitaan sang solusyon ang makita nga problema sa sulod sang ospital.
Ginklaro ni Magbanua nga sa iya pagpungko bilang gobernador sang Disyembre 25, 2019 wala ini sang may nabaton nga problema nga nahinabo sa ospital bangud kun may yara lamang iya ini ginahatagan sang aksyon kag solusyon.
Samtang ginakabig ni Magbanua nga isa ka welcome development ang plano sang gobernador nga magre-convene ang Provincial Development Council ukon PDC agud masolusyunan na ang problema nga nakita sang Sangguniang Panlalawigan sa mga duplikasyon sang mga proyekto sa 20 porsyento nga development fund sang Annual Investment Program 2020.
