ROXAS CITY – Ginaduso subong sang Sanggunian Panlalawigan ang pagpatigayon sang virtual meeting ukon sessions bilang paghalong man batuk sa Coronavirus Disease ukon COVID-19 Pandemic.
Ini ang ginpahayag ni Hon. Mateo Hachuela sang mainterview sang Bombo Radyo.
Suno kay Hachuela nga naga-request ang Sangguniang Panlalawigan kay Vice Governor James Mitang Magbanua agud nga pahanugotan ang ginahinyo nga virtual session sang mga board members.
Mahibaluan nga tanan nga mga board members ang nagpirma ukon nagpabor sa nasambit nga virtual session kun sa diin ginalakipan ini nanday Board Members Enrique Martin, Jonathan Besa, Esteban Jose Contreras, Weldie Apolinario, Elmer Arevalo, Karen Palomar, Victor Tanco Jr., Eliuper Martinez, Mitchelle John Patricio kag Querobin Pamplona magluwas lamang kanday Board Members Thea Faith Reyes kag Hachuela.
Ginpahayag sini nga nagkuha sila sang IT Experts agud nga ma-tsekyar ang ila luyag nga matabo sa tion nga matigayon ang ila nga virtual sessions kun sa diin makita sa wide screen ang tanan nga mga board members kag presiding officer.
Gin-athag man ni Hachuela nga indi man ini madali bangud kinahanglan gid ini painan sang budget.
Matandaan nga nagpatawag ini sang committee hearing of the whole sa Sangguniang Panlalawigan agud nga mabal-an kun ano ang luyag nga matabo natuhoy diri.
Aminado man ini nga pabor siya sa nasambit nga virtual sessions bangud indi na sila obligado nga magkadto sa kapitolyo probinsyal.
Apang, indi sini luyag nga makabati sang mga malain nga tinaga kag basulon sang mga tawo nga kasubong nagaguwa nga nagapahapos nalang sila kag ginahimo nga rason ang pandemya agud nga indi makatrabaho.
Indi lipod nga halos ang iban man nga mga ahensya sang gobyerno ang nagapatigayon naman sang virtual meeting ukon virtual session agud malikawan nga ma-infect sa virus sumugod nga nag-abot ang pandemya sa pungsod.
