ROXAS CITY – Magahatag sang P5 million financial assistance si Bise-Presidente Leni Robredo sa 1, 877 ka mga mangunguma nga miyembro sang Panit-an Integrated Farmer’s Association sa iya nga pagbisita sa probinsiya sang Capiz.
Pagagamiton ini para sa proyekto sang asosasyon kalakip na ang pagbakal sang pila ka mga kagamitan sa panguma kapareho sang four-wheel drive tractor, combine rice harvester kag rice transplanter.
Magluwas sa pinansiyal nga bulig gikan sa bise-presidente, magahatag man sang P980, 000 nga counterpart ang lokal nga gobyerno sang banwa sang Panit-an.
Mahibaluan nga nangin benepisyaryo sang bise-presidente ang mga mangunguma sa nasambit nga banwa bangud 60% sa mga ini ang lunsay pigado kag tuman nga apektado ang ila ulumhan sa tagsa ka mag-ulan.
Subong nga adlaw personal nga igahatag ni Robredo ang nasambit nga bulig sa mga mangunguma sa Barangay Balatucan, Panit-an.
Natalana man nga magbisita si Robredo sa mga pasyente nga benepisyaryo sang tatlo ka adlaw nga libre nga surgical mission sang World Surgical Foundation sa Roxas Memorial Provincial Hospital.
