Patay ang walo ka bulan nga lapsag nga karga sang iya nga tiyo matapos mabungguan sang ila ginasakyan nga tricycle ang isa ka motorsiklo nga nagbaliskad sa Barangay Sulangan, Dumangas, Iloilo.
Sa kuha sang CCTV, makit-an nga hinali lang natumba ang isa ka motorsiklo sa karsada kag nabungguan sang kasugata nga tricycle.
Bangud sa mabaskog nga impact sang pagkabunggo, nagkulob ang tricycle kag nagtabog ang mga sakay kag nabuy-an sang tiyo ang lapsag nga nahulog halin sa tricycle.
Nagtabog man ang rider sang motorsiklo apang madasig ini nga nagtindog para buligan ang mga sakay sang tricycle kag ang lapsag.
Gindala sa ospital ang lapsag apang gindeklara nga dead-on-arrival, samtang nag-angkon naman sang minor nga pilas ang iban nga pasahero kag driver sang tricycle.
Gindala naman sa ospital ang 15-anyos nga driver sang motorsiklo kag matapos nga ginbulong, gin-turnover ini sa Municipal Social Welfare and Development Office (MSWDO) sang nasambit nga banwa.
Padayon naman nga gina-assist sang mga pulis ang pamilya sang biktima kun ano ang mangin tikang nila batuk sa 15-anyos nga driver sang motorsiklo.
