Napaslawan ang South Korean police nga dakpon si South Korean President Yoon Suk-yeol sa iya presidential residence sa Seoul.
Ini matapos ang standoff sa tunga sang arrest team kag presidential security team ni Yoon nga nagdugay sang halos 6 ka oras.
Nagtipun-tipon man ang mga tagasuporta ni Yoon malapit sa presidential residence agud punggan ang pagdakop sa iya.
Suno sa Corruption Investigation Office (CIO) nga nagpanguna sa joint investigation batuk kay Yoon, wala nila naserbe ang arrest warrant matapos sila nga harangon sang 200 mga suldado kag presidential security personnel, base sa report gikan sa Yonhap news agency.
Maluwas diri, masobra 10 bus kag passenger cars ang nagharang sa dalanon padulong sa presidential residence rason nga nangin imposible nga makasulod ang mga ini sa nasambit nga establishimento.
Suno naman sa isa ka imbestigador sang CIO, nagdesisyon sila nga suspendihon ang pagserbe sang arrest warrant kay Yoon bangud sa safety concerns. Pahayag naman sang opisina nga may pila kag gamay kag dalagkuan nga alitan nga natabo samtang ginatestingan nila nga madakpan si Pres. Yoon.
Samtang, kasunod sang natabo nga standoff, napabalita nga na-indict ang hepe sang presidential security service nga si Park Jong-joon nga ginpahamtang ni Pres. Yoon kaupod ang iya deputy bangud sa obstruction of justice.
Suno sa SoKor police, wala nila naserbe ang arrest warrant batuk kay Yoon bangud sa illegal obstruction sang security service.
Matandaan nga nauna nga gin-impeach sang parliament si Yoon sang Disyembre 14, 2024 bangud sa alegasyon nga insurrection bangud sa madali kag napaslawan nga martial law sang Disyembre 3 apang suspendido lamang ini sa iya duties samtang nakabinbin pa ang ruling sang Constitutional Court nga magadesisyon kun tayuyon nga masipa si Yoon. Rason nga technically, si Yoon gihapon ang Presidente sang South Korea nga nagakahulugan nga may proteksiyon gihapon ini gikan sa presidential security.
Samtang, suno naman sa mga imbestigador, posible nga makakasan ang pagtuon kag pagdesisyon sa masunod nga tikang matapos ang kapaslawan sa pagdakop kay Yoon. Apang, posible naman nga mag-request sila sang panibag-o nga arrest warrant bag-o magpaso ang nauna nga warrant sa Lunes. Kun kinahanglan, may opsiyon ang mga imbestigador nga mag-request sang extension ukon mag-isyu liwat sang warrant.
